İşğaldan azad olunmuş torpaqlarda, doğma Qarabağda şirkətimiz bir sıra sosial məsuliyyət yönümlü layihələri silsilə şəkildə icra etməyə davam edir. Bu dəfəki istiqamətimiz isə 5 il bundan öncə işğaldan azad olunmuş Kəlbəcər rayonudur. Bildiyimiz kimi, 25 noyabr “Kəlbəcər şəhəri günü” kimi qeyd olunur və bu münasibətilə şirkətimiz Kəlbəcər rayon orta məktəbə 73 noutbuk, periferiya avadanlıqları hədiyyə etmişdir. Kəlbəcər rayonunun qəliz relyefi və coğrafi mövqeyini nəzərə almaqla, məktəbdə təhsil alan şagirdlərin tədris prosesini təkmilləşdirmək, eləcə də asudə vaxtlarını daha səmərəli təşkil etmək, onlayn təlimlərə qoşulmaq, dünyagörüşlərini və internet araşdırmalarını artırmaq  məqsədilə 63 şagirdə 63 noutbuk, məktəbin müəllim heyətinə isə əlavə olaraq 10 ədəd noutbuk, ekran/proyektor və printerlər ianə edilmişdir.

Tədbirdə “Azerbaijan Technologies” şirkətinin rəhbəri Zülfüqar Babayev, B.Cəfərov adına məktəbin direktoru və müəllim heyəti, Şərqi Zəngəzur Təhsil İdarəsinin bölgə üzrə müdiri və Prezidentin Kəlbəcər rayonu üzrə xüsusi nümayəndəliyinin vəzifəli şəxsləri iştirak edirdilər. Məktəblilərin də tədbirdə maraqlı çıxışları oldu, tədbirin sonunda isə rəsmi nümayəndələr və məktəbin direktoru bir daha belə gözəl təşəbbüsə görə “Azerbaijan Technologies” şirkətinə dərin təşəkkür və minnətdarlıqlarını bildirdilər.

Bu ianə “Azerbaijan Technologies” şirkətinin Qarabağda icra etdiyi artıq 3-cü sosial məsuliyyət yönümlü layihədir. Belə ki, şirkətimiz 01.11.2023-cü il tarixində Laçın rayonu 2 saylı orta məktəbə 30 ədəd noutbuk hədiyyə etmiş, elə həmin ilin dekabr ayında isə Laçınlı məktəblilər arasında ilk gaming festivalını təşkil etmişdir. Ardınca, 05.12.2024-cü il tarixində Xankəndində, Qarabağ Universitetində “AZTECH” otağını təsis edərək, “Azerbaijan Technologies” şirkəti yüksək qrafik göstəricilərinə malik 15 ədəd kompüter dəstini Universitetin Dizayn və Tətbiqi Sənət kafedrasına hədiyyə etmişdir. Eyni zamanda Qarabağda ilk kompüter oyunları turnirini də Xankəndində, Qarabağ Universitetində məhz “Azerbaijan Technologies”  şirkəti keçirmişdir. Gələcəkdə də belə tədbirlərin keçirilməsi nəzərdə tutulub!